Article published on Mawbima on 29 July 2024 |
ලංකා ඉදිකිරීම්කරුවන්ගේ ආයතනය (CIOB) සහ මොරටුව විශ්වවිද්‍යාලයේ ගොඩනැඟිලි, ආර්ථික හා කළමනාකරණ පර්යේෂණ ඒකකය (BEMRU) එක්ව සංවිධානය කරන 12 වැනි ලෝක ඉදිකිරීම් සම්මන්ත්‍රණය අගෝස්තු 9 සහ 10 යන දිනවල කොළඹ ටාජ්සමුද්‍රා හෝටලයේදී පැවැත්වේ. සම්මන්ත්‍රණයේ තේමාව වන්නේ “ඉදිකිරීම් කර්මාන්තය සවිබල ගැන්වීම: තිරසර සංවර්ධන ඉලක්ක කරා” යන්නයි.
මොරටුව විශ්වවිද්‍යාලය සහ ලංකා ඉදිකිරීම්කරුවන්ගේ ආයතනය විසින් වාර්ෂිකව පවත්වනු ලබන ලෝක ඉදිකිරීම් සම්මන්ත්‍රණය මඟින් ලොව පුරා ගොඩනඟන ලද ඉදිකිරීම් ක්ෂේත්‍රය ආශ්‍රිත පර්යේෂණ ක්ෂේත්‍රවල පර්යේෂකයන් සහ වෘත්තිකයන් සඳහා ඔවුන්ගේ දැනුම, අත්දැකීම් සහ පර්යේෂණ සොයා ගැනීම් බෙදාහදා ගැනීම සඳහා විශේෂ සංසදයක් ලබාදෙනු ඇත. ලංකා ඉදිකිරීම්කරුවන්ගේ ආයතනය මෙම සම්මන්ත්‍රණය 2012 වසරේ ආරම්භ කළ දා සිට ඉතා සාර්ථකව පවත්වයි. සෑම වසරකම එය ශ්‍රී ලාංකේය ඉදිකිරීම් ක්ෂේත්‍රයේ උන්නතියට දායක වන සහභාගිවන්නන්ගේ විෂය පථය වර්ධනය කර පුළුල් කර ඇත.
12 වැනි ලෝක ඉදිකිරීම් සම්මන්ත්‍රණය සමාප්ති උත්සවය ලෙස වාර්ෂික සම්මාන ප්‍රදානෝත්සවය පැවැත්වීමට සැලසුම් කර ඇත. ශාස්ත්‍රීය ලිපි ලේඛන සහ සංකල්ප යථාර්ථයක් බවට පරිවර්තනය කිරීම එහි අරමුණ වේ. මොරටුව විශ්වවිද්‍යාලය විසින් පවත්වනු ලබන තිරසර සංවර්ධනය පිළිබඳ නව්‍ය වාර්ෂික සම්මන්ත්‍රණයට සහාය දැක්වීමට ටෝකියෝ සිමෙන්ති ලංකා පී.එල්.සී. ආයතනය ප්‍රධාන අනුග්‍රාහකයා ලෙස ඉදිරිපත් වී සිටී.